سال 2025 کا سب سے بڑا سپر مون آج رات آسمان پر جلوہ گر ہوگا

آج رات پاکستانی آسمان پر سال 2025 کا سب سے بڑا اور روشن چاند اپنی پوری آب و تاب کے ساتھ نظر آئے گا۔ ماہرین فلکیات کے مطابق یہ سپر مون غروبِ آفتاب کے فوراً بعد طلوع ہوگا۔

جب چاند اپنی بیضوی مدار میں زمین کے قریب ترین مقام پر پہنچتا ہے تو وہ معمول سے زیادہ بڑا اور روشن دکھائی دیتا ہے، اور اسی مظہر کو “سپر مون” کہا جاتا ہے۔

اس موقع پر چاند زمین سے تقریباً 3 لاکھ 56 ہزار 980 کلومیٹر کے فاصلے پر ہوگا، جس کے باعث وہ عام دنوں کے مقابلے میں تقریباً 8 فیصد بڑا اور 16 فیصد زیادہ روشن دکھائی دے گا۔

یہ 2025 کا دوسرا سپر مون ہے — پہلا سپر مون 7 اکتوبر کو دیکھا گیا تھا، جبکہ رواں سال کا آخری سپر مون 5 دسمبر کو طلوع ہوگا۔

ماہرین کے مطابق سپر مون کو دیکھنے کا سب سے دلکش وقت اس کے طلوع ہونے کے پہلے گھنٹے میں ہوتا ہے، کیونکہ اس وقت یہ افق کے قریب ہونے کی وجہ سے اپنے حقیقی حجم سے بھی زیادہ بڑا محسوس ہوتا ہے۔

فلکیاتی ماہرین کا کہنا ہے کہ یہ منظر نہ صرف سائنسی لحاظ سے دلچسپ ہے بلکہ فطرت کے حسین نظاروں میں سے ایک ہے جسے کھلی فضا میں دیکھنا ایک یادگار تجربہ بن سکتا ہے۔