رمضان 2026 کا آغاز قریب: دنیا بھر کے مسلمان روزوں کے لیے تیار

رمضان المبارک کی آمد قریب آچکی ہے اور اس بابرکت مہینے کے آغاز میں اب صرف ایک ہفتہ باقی رہ گیا ہے۔ دنیا بھر کے مسلمان رمضان کے استقبال کی تیاریوں میں مصروف ہیں، جو روزے، عبادات اور روحانی یکسوئی کا مہینہ سمجھا جاتا ہے۔
فلکیاتی ماہرین کے مطابق رمضان 2026 کا آغاز 19 فروری کو متوقع ہے، تاہم اگر 18 فروری کو چاند نظر آ گیا تو رمضان ایک دن قبل شروع ہو سکتا ہے۔ قمری کیلنڈر کے مطابق اسلامی مہینوں کا آغاز چاند دیکھنے پر ہوتا ہے اور ہر مہینہ 29 یا 30 دن کا ہوتا ہے۔
رواں برس رمضان گزشتہ سال کے مقابلے میں تقریباً 10 سے 12 دن پہلے آ رہا ہے، جس کے باعث دن کا دورانیہ نسبتاً مختصر ہوگا۔ اس تبدیلی کے نتیجے میں روزوں کے اوقات میں بھی کمی متوقع ہے، جو روزہ رکھنے والوں کے لیے سہولت کا باعث بنے گی۔
روزہ صبح صادق سے لے کر غروب آفتاب تک رکھا جاتا ہے، اور اس کا دورانیہ ہر ملک میں سورج کے طلوع و غروب کے اوقات کے مطابق مختلف ہوتا ہے۔ جغرافیائی محلِ وقوع کی بنیاد پر دنیا کے مختلف حصوں میں روزے کے اوقات میں واضح فرق دیکھا جاتا ہے۔
مشرقِ وسطیٰ اور شمالی افریقا جیسے معتدل علاقوں میں روزے کا دورانیہ متوازن رہتا ہے۔ اندازہ ہے کہ متحدہ عرب امارات میں رمضان 2026 کے پہلے روزے کا دورانیہ تقریباً 12 گھنٹے اور 46 منٹ ہوگا، جو گزشتہ سال کے مقابلے میں تقریباً آدھا گھنٹہ کم ہے۔ جیسے جیسے مہینہ آگے بڑھے گا، روزے کا دورانیہ بتدریج بڑھتا جائے گا۔
یورپ کے شمالی ممالک جیسے ناروے، سویڈن، فن لینڈ، آئس لینڈ اور گرین لینڈ میں دن طویل ہونے کی وجہ سے روزے 16 گھنٹے یا اس سے زیادہ طویل ہو سکتے ہیں۔ بعض انتہائی شمالی علاقوں میں دن کی روشنی بہت زیادہ ہونے کے باعث روزہ 20 گھنٹے تک بھی ہو سکتا ہے۔
اس کے برعکس جنوبی نصف کرہ اور خطِ استوا کے قریب واقع ممالک میں دن چھوٹے ہوتے ہیں، جس کی وجہ سے وہاں روزے کا دورانیہ نسبتاً کم رہتا ہے۔ برازیل، جنوبی افریقا، چلی، نیوزی لینڈ، انڈونیشیا، ملائیشیا اور کینیا جیسے ممالک میں روزے کا دورانیہ تقریباً 11 سے 14 گھنٹے کے درمیان متوقع ہے۔
علمائے کرام کے مطابق جن علاقوں میں دن یا رات غیر معمولی حد تک طویل یا مختصر ہوں، وہاں روزے کے اوقات مکہ مکرمہ یا کسی قریبی معتدل علاقے کے اوقات کے مطابق رکھے جا سکتے ہیں۔
مجموعی طور پر رمضان 2026 میں روزوں کا دورانیہ گزشتہ برس کے مقابلے میں کچھ کم ہوگا، جو دنیا بھر کے مسلمانوں کے لیے نسبتاً آسانی اور سہولت کا باعث بنے گا۔