دنیا کا سب سے ہلکا لیپ ٹاپ پیش — وزن صرف 634 گرام

جاپان کی معروف ٹیکنالوجی کمپنی فوجیتسو نے نیا لیپ ٹاپ ایف ایم وی یو ایچ ایکس/کے تھری متعارف کرایا ہے، جو محض چھ سو چونتیس گرام وزن کے ساتھ دنیا کے ہلکے ترین لیپ ٹاپس میں شامل ہو گیا ہے۔

اس سے پہلے بھی فوجیتسو ہی نے ایسے ماڈلز متعارف کروائے تھے جو وزن کے لحاظ سے انتہائی ہلکے تھے، جیسے دو ہزار بائیس کا ڈبلیو یو ایکس-جی ٹو اور دو ہزار چوبیس کا ڈبلیو یو فائیو-جے تھری، جن کا وزن بھی چھ سو چونتیس گرام تھا۔

نئے ماڈل کو ہلکا رکھنے کے لیے خصوصی میٹریلز استعمال کیے گئے ہیں۔ لیپ ٹاپ کا اوپری حصہ کاربن فائبر سے تیار کیا گیا ہے، جب کہ کی بورڈ اور نچلا حصہ میگنیشیئم لیتھیئم سے بنایا گیا ہے، تاکہ وزن کم ہو لیکن مضبوطی برقرار رہے۔

یہ لیپ ٹاپ جدید ہارڈ ویئر سے لیس ہے، جس میں انٹیل کور الٹرا سیون ٹو ففٹی فائیو یو پروسیسر اور آرٹیفیشل انٹیلیجنس انجن شامل ہے۔ اس کے علاوہ، سولہ جی بی ریم اور پانچ سو بارہ جی بی اسٹوریج کے ساتھ چودہ انچ کا ڈسپلے بھی فراہم کیا گیا ہے۔

وائرلیس کنیکٹیویٹی کے شعبے میں یہ لیپ ٹاپ جدید فیچرز فراہم کرتا ہے جیسے وائی فائی سیون اور بلو ٹوتھ ورژن فائیو پوائنٹ فور۔ پورٹس میں یو ایس بی ٹائپ-سی، یو ایس بی ٹائپ-اے، ایچ ڈی ایم آئی اور مائیکرو ایس ڈی سلاٹ شامل ہیں۔

سیکیورٹی کے لیے ونڈوز ہیلو فنگر پرنٹ سینسر اور ویب کیم پر پرائیویسی شٹر بھی دیا گیا ہے۔

بیٹری کی کارکردگی بھی متاثر کن ہے — ویڈیو پلے بیک پر تقریباً سات گھنٹے جبکہ عام استعمال پر اٹھارہ گھنٹے تک چلنے کی صلاحیت رکھتی ہے۔ چارجر کا وزن صرف ایک سو اکیاون گرام ہے، جو سابقہ ماڈلز سے کافی کم ہے۔

اس ہلکے اور طاقتور لیپ ٹاپ کی قیمت تقریباً ایک ہزار آٹھ سو تریسٹھ امریکی ڈالر مقرر کی گئی ہے۔