دنیا کا سب سے بڑا مکڑیوں کا جالا دریافت

سائنسدانوں نے دنیا کا سب سے بڑا مکڑیوں کا جالا دریافت کیا ہے، جو حیرت انگیز طور پر ایک لاکھ 10 ہزار سے زائد مکڑیوں کا گھر ہے۔

یہ جالا ایک غار کے اندر، البانیا اور یونان کی سرحد پر واقع سلفر غار میں پایا گیا ہے اور اندازاً 106 مربع میٹر رقبے پر پھیلا ہوا ہے۔ ماہرین کے مطابق یہ جالا ایسا لگتا ہے جیسے مکڑیوں کا ایک چھوٹا شہر ہو۔

دلچسپ بات یہ ہے کہ اس جالے میں دو مختلف اقسام کی مکڑیاں ایک ساتھ رہ رہی ہیں، جو عام حالات میں ایک دوسرے کا شکار کرتی ہیں۔ تاہم غار کی تاریکی اور مخصوص ماحول نے انہیں مشترکہ رہائش اختیار کرنے پر مجبور کر دیا۔ کچھ مقامات پر یہ جالا اتنا وزنی ہے کہ اپنی دیوار سے نیچے آ گیا ہے۔

رومانیہ کی ٹرانسلونیا یونیورسٹی کے ماہرین نے اس دریافت پر تبصرہ کرتے ہوئے کہا ہے کہ یہ ثابت کرتا ہے کہ ہماری دنیا میں اب بھی کئی حیرت انگیز اور انوکھے مظاہر چھپے ہوئے ہیں۔

اس تحقیق کے نتائج جرنل Subterranean Biology میں شائع ہوئے ہیں۔