دبئی کی عدالت کا بھارتی بزنس مین بی آر شیٹی کے خلاف بڑا فیصلہ، 16 کروڑ درہم کی ادائیگی کا حکم

0
18

دبئی – دبئی انٹرنیشنل فنانشل سینٹر کی عدالت نے معروف بھارتی کاروباری شخصیت بی آر شیٹی کے خلاف فیصلہ سناتے ہوئے بینک آف انڈیا کو 16 کروڑ 87 لاکھ درہم کی ادائیگی کا حکم دیا ہے۔

عدالتی فیصلے میں کہا گیا ہے کہ بی آر شیٹی نے ذاتی ضمانت سے متعلق عدالت کے سامنے جھوٹا بیان دیا۔ جج جسٹس اینڈریو موران کے مطابق، شیٹی کی گواہی میں تسلسل کے ساتھ جھوٹ شامل تھا جسے عدالت نے ناقابلِ یقین قرار دیا۔

عدالت کے مطابق، بی آر شیٹی نے 2018 میں 50 ملین ڈالر قرض کے لیے ذاتی ضمانت دی تھی، تاہم اس ضمانت کے وقت انہوں نے حقائق چھپائے اور غلط بیانی کی۔ عدالت نے شواہد کو “ناقابل تردید” قرار دیا، اور قرض کی عدم ادائیگی پر سالانہ 9 فیصد سود بھی عائد کیا ہے۔ اس حساب سے روزانہ تقریباً 11 ہزار 341 امریکی ڈالر کا سود لاگو ہوگا جب تک مکمل ادائیگی نہ ہو جائے۔

بی آر شیٹی وہی کاروباری شخصیت ہیں جنہوں نے 1970 کی دہائی میں متحدہ عرب امارات میں صحت کے شعبے میں سرمایہ کاری کرتے ہوئے ایک معروف اسپتال قائم کیا تھا۔ ان کی کمپنی، جو کبھی لندن اسٹاک ایکسچینج میں درج تھی اور 10 ارب ڈالر تک کی مالیت رکھتی تھی، 2020 میں سامنے آنے والے 4 ارب ڈالر کے خفیہ قرضوں کے انکشاف کے بعد دیوالیہ ہو گئی تھی۔

اسی سال شیٹی نے اپنے عہدوں سے استعفیٰ دیا اور بھارت واپس چلے گئے۔ کیس کی تفتیش میں دستخطوں کے ماہرین نے ان کے دستخط کی تصدیق کی، جس نے عدالت کے فیصلے میں اہم کردار ادا کیا۔

Leave a reply