دبئی ایئرپورٹ کے قریب ڈرون واقعہ، پروازیں عارضی طور پر معطل

دبئی: پیر کے روز دبئی انٹرنیشنل ایئرپورٹ کے قریب ایک ڈرون واقعہ پیش آیا جس کے باعث کچھ دیر کے لیے فضائی آپریشن متاثر ہوا اور متعدد پروازوں کو عارضی طور پر معطل کرنا پڑا۔ حکام کے مطابق واقعے میں کسی جانی نقصان کی اطلاع نہیں ملی۔

دبئی میڈیا آفس کے مطابق ایئرپورٹ کے قریب ایک ڈرون گرنے یا ٹکرانے کے باعث ایندھن کے ایک ٹینک کو نقصان پہنچا۔ حفاظتی اقدامات کے تحت ایئرپورٹ سے ملحقہ بعض سڑکوں کو بھی کچھ وقت کے لیے بند کر دیا گیا تھا۔

متعلقہ حکام کا کہنا ہے کہ احتیاطی تدابیر کے طور پر کئی پروازوں کو عارضی طور پر روک دیا گیا جبکہ کچھ پروازوں کا رخ المکتوم انٹرنیشنل ایئرپورٹ کی جانب موڑ دیا گیا۔

ایئرلائن حکام نے مسافروں کو ہدایت کی ہے کہ وہ ایئرپورٹ آنے سے پہلے اپنی پرواز کی صورتحال کے بارے میں متعلقہ ایئرلائن سے معلومات حاصل کریں۔ حکام کا کہنا ہے کہ حالات بہتر ہوتے ہی فلائٹ آپریشن مرحلہ وار بحال کیا جائے گا۔

دوسری جانب خطے میں بڑھتی ہوئی کشیدگی اور ممکنہ میزائل و ڈرون خطرات کے باعث مشرقِ وسطیٰ کی فضائی حدود پر بھی اثرات مرتب ہو رہے ہیں، جس کے نتیجے میں متعدد پروازیں منسوخ، مؤخر یا متبادل راستوں پر منتقل کی جا رہی ہیں۔

حکام کے مطابق مسافروں کو تازہ ترین صورتحال سے آگاہ رکھنے کے لیے مزید اپ ڈیٹس جاری کی جاتی رہیں گی۔