دبئی ایئرپورٹ پر جدید اسمارٹ کوریڈور، امیگریشن کا عمل چند سیکنڈز میں مکمل

دبئی انٹرنیشنل ایئرپورٹ نے مسافروں کے لیے ایک نئی انقلابی سہولت متعارف کرائی ہے — “آرٹیفیشل انٹیلیجنس اسمارٹ کوریڈور”، جو امیگریشن کے عمل کو تیز تر، آسان اور مکمل طور پر خودکار بنا دیتا ہے۔

اس جدید کوریڈور کی خاص بات یہ ہے کہ مسافروں کو نہ تو پاسپورٹ دکھانے کی ضرورت ہے، نہ ہی بورڈنگ پاس اسکین کرنے کی۔ جدید چہرہ شناختی نظام کی بدولت مسافر صرف چند لمحوں میں امیگریشن کی کارروائی مکمل کر لیتے ہیں۔ ایک وقت میں 10 افراد تک اس کوریڈور سے بیک وقت گزر سکتے ہیں، جو خاص طور پر فیملیز کے لیے نہایت مفید ہے۔

فی الحال یہ سہولت دبئی ایئرپورٹ کے ٹرمینل 3 کے بزنس کلاس ڈپارچر ہال میں دستیاب ہے، تاہم حکام کا کہنا ہے کہ مستقبل میں اسے ایئرپورٹ کے دیگر ٹرمینلز تک بھی توسیع دی جائے گی۔

یہ اسمارٹ کوریڈور دبئی کے اس وژن کا حصہ ہے جس کے تحت شہر کو دنیا کے جدید ترین اور اسمارٹ شہروں میں شامل کرنے کے لیے ڈیجیٹل ٹیکنالوجی اور مصنوعی ذہانت کو کلیدی حیثیت دی جا رہی ہے۔

اس اقدام سے نہ صرف مسافروں کا قیمتی وقت بچے گا بلکہ امیگریشن کا عمل بھی پہلے سے کہیں زیادہ آسان اور خوشگوار ہو جائے گا۔