خیبر پختونخوا میں امن کے قیام کے لیے پی ٹی آئی کا بڑا اقدام، اسمبلی میں امن جرگہ بلانے کا فیصلہ

پشاور: پاکستان تحریکِ انصاف نے خیبر پختونخوا اسمبلی میں امن جرگہ بلانے کا فیصلہ کیا ہے، جس کا مقصد دہشت گردی کے خاتمے اور پائیدار امن کے لیے مشترکہ حکمتِ عملی تشکیل دینا ہے۔

وزیراعلیٰ ہاؤس پشاور میں ہونے والے اجلاس کی صدارت وزیراعلیٰ خیبر پختونخوا سہیل آفریدی نے کی، جس میں پی ٹی آئی چیئرمین بیرسٹر گوہر علی خان، صوبائی صدر جنید اکبر، سابق اسپیکر قومی اسمبلی اسد قیصر اور دیگر رہنماؤں نے شرکت کی۔

اجلاس میں صوبے کی امن و امان کی مجموعی صورتحال پر تفصیلی غور کیا گیا۔ قیادت نے فیصلہ کیا کہ اسمبلی میں ہونے والے امن جرگے میں سابق وزرائے اعلیٰ، گورنرز، علمائے کرام، قبائلی مشران، سول سوسائٹی کے نمائندے اور وکلاء کو مدعو کیا جائے گا، تاکہ امن کے قیام کے لیے ایک متفقہ لائحہ عمل طے کیا جا سکے۔

وزیراعلیٰ سہیل آفریدی نے کہا کہ حکومت کا پہلا ہدف پولیس کو جدید آلات، تربیت اور وسائل کی فراہمی ہے تاکہ دہشت گردی کے خلاف مؤثر کارروائی ممکن بنائی جا سکے۔

اس سے قبل وزیراعلیٰ نے باڑہ میں امن جرگے سے خطاب کرتے ہوئے کہا کہ ضم اضلاع کے بقایاجات فوری طور پر ادا کیے جائیں، ہمیں بھیک نہیں بلکہ اپنا حق چاہیے۔ انہوں نے اعلان کیا کہ ہر ضلع میں امن جرگے منعقد کیے جائیں گے تاکہ عوامی شمولیت کے ذریعے دیرپا امن قائم ہو۔