خلیج میں کشیدگی: قطر اور کویت میں میزائل اور ڈرون حملے

قطر کی وزارت دفاع نے تصدیق کی ہے کہ ایران کی جانب سے داغے گئے تین کروز میزائلوں میں سے ایک نے قطر کی حدود میں ایک بڑے آئل ٹینکر کو نشانہ بنایا۔ دو میزائلوں کو فضا میں ہی تباہ کر دیا گیا۔
یو کے میری ٹائم ٹریڈ آپریشنز کے مطابق واقعہ قطر کے راس لفان انڈسٹریل ہب سے تقریباً 31 کلومیٹر شمال میں پیش آیا، جس سے بحری جہاز کے بائیں حصے کو نقصان پہنچا۔ قطری وزارت دفاع کا کہنا ہے کہ جہاز کے عملے کے تمام 21 ارکان محفوظ رہے اور بروقت نکال لیے گئے۔ قطر انرجی کے مطابق حملے سے سمندری ماحول کو کوئی نقصان نہیں پہنچا۔
اسی دوران کویت میں بین الاقوامی ہوائی اڈے پر ایندھن کے ٹینکوں کو ڈرون حملوں کا نشانہ بنایا گیا، جس کے نتیجے میں شدید آگ بھڑک اٹھی۔ حکام کے مطابق ایک ہفتہ قبل بھی اسی ایئرپورٹ پر ڈرون حملے کے بعد آگ بجھانے میں کئی گھنٹے لگے تھے۔
خلیج کے دیگر علاقوں میں بھی صورتحال کشیدہ ہے، جہاں دبئی کے ساحل پر خام تیل سے لدے ٹینکر اور دوحہ کے قریب بحری جہاز کو حملوں کا نشانہ بنایا گیا۔ بحرین اور سعودی عرب کے مشرقی صوبوں میں بھی ڈرون اور میزائل حملوں کی اطلاعات موصول ہو رہی ہیں۔