حکومت کے خلاف سیاسی تحریک تیار : اسد قیصر

ہاٹ لائن نیوز : پاکستان تحریک انصاف کے رہنما اسد قیصر نے حکومت مخالف تحریک شروع کرنےسے متعلق کہا ہےکہ ہم میٹنگز کر رہے ہیں، تحریک کیسے چلانی ہے اس کا مکمل شیڈول بنائیں گے۔ ہم یہ بھی دیکھیں گے کہ ہم سے کہاں غلطیاں ہوئیں اور انہیں کہاں ٹھیک کرنا ہے۔

اسد قیصر نے کہا کہ ہم ایک سیاسی جماعت ہیں اور ایک سیاسی جماعت صرف جدوجہد کر سکتی ہے اور آواز اٹھا سکتی ہے، یہ لڑنے والی نہیں ہوتی۔

انہوں نے کہا کہ جب ریاست فاشسٹ بن جائے گی، طاقت کا غلط استعمال کرے گی اور اپنے وسائل کا استعمال کرکے کسی سیاسی جماعت کو تباہ کرے گی اور ملک کو اپنے طریقے سے چلائے گی تو اس کے خلاف جدوجہد کی جائے گی۔

انہوں نے کہا کہ ہم تحریک چلائیں گے، ہم وکلاء برادری کا ردعمل بھی دیکھیں گے، ہم دیگر سیاسی جماعتوں کو بھی شامل کریں گے اور ساتھ ہی اسے وسیع تر کرنے کی کوشش کریں گے اور یہ تحریک پورے پاکستان میں چلائیں گے۔ ہم عدلیہ کی آزادی کے لیے یہ تحریک جاری رکھیں گے۔