بجلی صارفین کے لیے ایک ماہ کے لیے اضافی بوجھ کا امکان

سنٹرل پاور پرچیزنگ ایجنسی (CPPA) نے دسمبر کے ماہانہ فیول پرائس ایڈجسٹمنٹ کے تحت نیپرا سے درخواست دی ہے، جس کے تحت بجلی کے نرخ میں 48 پیسے فی یونٹ تک اضافہ ہو سکتا ہے۔
نیپرا اس درخواست پر 29 جنوری کو سماعت کرے گا۔ منظوری کی صورت میں کے الیکٹرک اور دیگر ڈسکوز کے صارفین پر مجموعی طور پر 4 ارب روپے سے زائد کا اضافی بوجھ پڑ سکتا ہے۔
درخواست میں بتایا گیا ہے کہ دسمبر میں ملک بھر میں بجلی کی پیداوار 8 ارب 48 کروڑ 70 لاکھ یونٹس رہی جبکہ ڈسکوز کو 8 ارب 20 کروڑ 80 لاکھ یونٹس فراہم کی گئیں۔ CPPA کے مطابق اس بجلی کی فی یونٹ لاگت 9 روپے 62 پیسے ریکارڈ کی گئی، جو پچھلے مہینوں کے مقابلے میں زیادہ ہے۔
اعداد و شمار کے مطابق دسمبر میں ہائیڈل ذرائع سے 18 فیصد اور مقامی کوئلے سے 13.9 فیصد بجلی پیدا ہوئی۔ مہنگے ایندھن کے استعمال اور پیداواری لاگت میں اضافے کو یہ درخواست جمع کرانے کی وجہ بتایا گیا ہے۔
نیپرا کی منظوری کی صورت میں یہ اضافہ ایک ماہ کے لیے صارفین کے بلوں میں شامل کیا جائے گا، جس سے سردیوں میں کم استعمال کے باوجود بجلی کے بل بڑھنے کا امکان ہے۔