بائیک رائڈرز کی حمایت کے بعد فضا علی کا پرانا کلپ کیوں وائرل ہوا؟

پاکستانی شوبز انڈسٹری کی معروف اداکارہ اور مارننگ شو میزبان فضا علی ایک بار پھر سوشل میڈیا پر موضوعِ بحث بن گئی ہیں۔ حالیہ دنوں میں ان کے بعض بیانات اور ویڈیوز وائرل ہونے کے بعد ایک نیا تنازع سامنے آیا ہے، جس میں انہوں نے بالواسطہ طور پر ساتھی میزبان ندا یاسر پر تنقید کی ہے۔
فضا علی نے سوشل میڈیا پر جاری ایک ویڈیو پیغام میں کہا کہ ملک اس وقت بے شمار سنجیدہ مسائل سے گزر رہا ہے، مگر اس کے باوجود عوام کی توجہ ان کی ذاتی زندگی کے ایک پرانے واقعے کی طرف مبذول کروائی جا رہی ہے۔ ان کا کہنا تھا کہ ان کی طلاق جیسے حساس معاملے کو دوبارہ اچھالنا افسوسناک ہے، خاص طور پر اس پہلو کو نمایاں کیا جانا کہ طلاق کے کاغذات پر دستخط کے وقت ان کے سابق شوہر کی طبیعت کیوں خراب ہوئی تھی۔
اداکارہ کے مطابق یہ پرانا کلپ اس وقت جان بوجھ کر دوبارہ سوشل میڈیا پر پھیلایا گیا جب انہوں نے بائیک رائڈرز کے حق میں آواز اٹھائی۔ فضا علی نے کہا کہ انہوں نے جو بات کی وہ دلیل اور سچ پر مبنی تھی، مگر اس کے جواب میں ان کی ذاتی زندگی کو نشانہ بنایا گیا۔
انہوں نے اس بات پر بھی روشنی ڈالی کہ طلاق خود ایک تکلیف دہ مرحلہ ہوتا ہے، لیکن ہمارے معاشرے میں عورت کو اس کے بعد مسلسل تنقید اور الزامات کا سامنا کرنا پڑتا ہے۔ فضا علی کا کہنا تھا کہ وہ اپنی زندگی میں آگے بڑھ چکی تھیں، تاہم ماضی کے واقعات کو دوبارہ سامنے لا کر انہیں وضاحتیں دینے پر مجبور کیا گیا۔
اداکارہ نے اس رجحان پر افسوس کا اظہار کرتے ہوئے کہا کہ کسی کے دکھ کو سوشل میڈیا مواد بنانا غیر مناسب عمل ہے۔ ان کے مطابق درد کی کوئی جنس نہیں ہوتی اور عزت وقت کے ساتھ ختم نہیں ہوتی۔ انہوں نے کہا کہ اگر ان کے پرانے کلپس دوبارہ شیئر کیے جائیں تو اس میں کمزوریاں نہیں بلکہ ان کی مضبوطی اور کردار کی سچائی نظر آئے گی۔
واضح رہے کہ فضا علی کا ایک پرانا ویڈیو کلپ، جس میں انہوں نے اپنی طلاق کے حوالے سے بات کی تھی، حالیہ دنوں میں مختلف سوشل میڈیا پلیٹ فارمز پر دوبارہ گردش کر رہا ہے، جس کے بعد یہ معاملہ ایک بار پھر عوامی بحث کا حصہ بن گیا ہے۔