“ایک لاکھ سے زائد جاپانی 100 سال کے پار، لمبی عمر کا راز صرف غذا نہیں!”

جاپان میں طویل العمر افراد کی تعداد میں ایک مرتبہ پھر اضافہ دیکھنے کو ملا ہے۔ سرکاری اعداد و شمار کے مطابق ستمبر 2025 تک ملک میں 100 سال یا اس سے زیادہ عمر کے افراد تقریباً ایک لاکھ تک پہنچ چکے ہیں، جن میں سے اکثریت خواتین کی ہے۔
ماہرین کے مطابق جاپان میں لمبی عمر کا تعلق صرف کسی ایک غذا یا مخصوص عادت سے نہیں بلکہ ایک متوازن طرزِ زندگی سے ہے۔ جاپانی معاشرہ خوراک، روزمرہ جسمانی سرگرمی، سماجی تعلقات اور صحت کے احتیاطی اقدامات کو باہم مربوط کر کے اپنا رہا ہے، جو طویل عرصے تک صحت برقرار رکھنے میں مددگار ثابت ہوتا ہے۔
ڈاکٹر آکار کپور، بانی سٹی امیجنگ اینڈ کلینیکل لیبز دہلی، کا کہنا ہے کہ جاپان میں لمبی عمر کے پیچھے روایتی غذا کے ساتھ ساتھ نظم و ضبط، روزانہ کی جسمانی سرگرمی اور سماجی وابستگی بھی اہم کردار ادا کرتے ہیں۔
جاپانی طرزِ زندگی میں کھانے کی مقدار پر خاص توجہ دی جاتی ہے۔ عام عادت یہ ہے کہ کھانا آہستہ کھایا جائے اور پیٹ مکمل بھرنے سے پہلے رک جانا، جس سے جسم پر میٹابولک دباؤ کم رہتا ہے۔ اس کے علاوہ الٹرا پروسیسڈ فوڈ اور زیادہ شکر کا استعمال نسبتا کم ہے، جو نظامِ ہاضمہ اور دل کی صحت کے لیے فائدہ مند ہے۔
ورزش اور جسمانی حرکت بھی جاپانی روزمرہ کا لازمی حصہ ہیں۔ لوگ پیدل چلنے، گھریلو کام اور مشغلے میں مصروف رہتے ہیں، جس سے بڑھاپے میں جسمانی کمزوری کی رفتار سست ہو جاتی ہے۔
شماریات کے مطابق جاپان میں زیادہ تر صدی عمر پار کرنے والے افراد خواتین ہیں۔ اس کی وجوہات میں حیاتیاتی فوائد، جیسے ایسٹروجن ہارمون کا دل کی بیماریوں سے تحفظ، اور خواتین کا اپنی صحت کے معاملے میں محتاط رویہ شامل ہیں۔ خواتین باقاعدگی سے طبی معائنہ کرواتی ہیں، متوازن غذا اختیار کرتی ہیں اور سماجی تعلقات قائم رکھتی ہیں، جو ذہنی دباؤ اور یادداشت کی کمزوری سے بچاؤ میں مددگار ہیں۔
جاپان کے مضبوط صحت کے نظام اور یونیورسل ہیلتھ کوریج نے بھی طویل عمر میں اہم کردار ادا کیا ہے۔ بروقت تشخیص، ویکسینیشن پروگرامز، کمیونٹی ہیلتھ مانیٹرنگ اور لانگ ٹرم کیئر سسٹم کی بدولت بزرگ افراد زیادہ عرصے تک فعال اور خودمختار رہ سکتے ہیں۔
ماہرین کا کہنا ہے کہ جاپان کی لمبی عمر کسی ایک نسخے یا غذا کا نتیجہ نہیں، بلکہ متوازن خوراک، باقاعدہ جسمانی سرگرمی، مضبوط سماجی تعلقات اور صحت کے نظام کی مستقل مزاجی کا ثمر ہے۔