ایپل کا سالانہ ایونٹ: آئی فون 17 سیریز کی رونمائی کی تاریخ سامنے آگئی

ایپل نے اپنے نئے پراڈکٹس کی رونمائی کے لیے سالانہ ایونٹ کی تاریخ کا اعلان کر دیا ہے، جس میں آئی فون 17 سیریز کو متعارف کرایا جائے گا۔ یہ ایونٹ ستمبر میں ایپل پارک، کیلیفورنیا میں منعقد ہوگا۔

ایپل کے مداح ہر سال نئی آئی فون سیریز کے منتظر رہتے ہیں، اور اس بار بھی آئی فون 17 سیریز نے شائقین میں خاصی دلچسپی پیدا کر رکھی ہے۔ اس سیریز میں کئی دلچسپ تبدیلیاں متوقع ہیں، جن میں ایک نیا ماڈل — آئی فون 17 ایئر — بھی شامل ہے۔

نیا آئی فون 17 ایئر: سب سے پتلا آئی فون

رپورٹس کے مطابق آئی فون 17 ایئر ایپل کا اب تک کا سب سے پتلا اسمارٹ فون ہوگا، جو آئی فون 16 پلس کی جگہ لے گا۔ اس ماڈل کو ایک ہلکے اور جدید ڈیزائن کے ساتھ پیش کیا جائے گا، جبکہ بیک پر ایک سنگل 48 میگا پکسل کیمرا دیا جائے گا۔ اگرچہ فیچرز کے لحاظ سے یہ اسٹینڈرڈ ورژن جیسا ہی ہوگا، مگر اس کا منفرد ڈیزائن اسے نمایاں بناتا ہے۔

پرو ماڈلز میں بڑی تبدیلیاں متوقع

آئی فون 17 پرو اور پرو میکس ماڈلز میں کیمرا ڈیزائن کو مکمل طور پر نئے انداز میں پیش کیے جانے کا امکان ہے۔ ماہرین کا کہنا ہے کہ اس بار پرو ماڈلز میں کارکردگی کے ساتھ ساتھ ظاہری ڈیزائن پر بھی بھرپور توجہ دی گئی ہے۔

ایونٹ میں آئی فونز کے ساتھ ایپل واچ سیریز 11 اور ائیر پوڈز پرو 3 کی جھلک بھی متوقع ہے، جس سے ایپل صارفین کی دلچسپی میں مزید اضافہ ہو گیا ہے۔