ایپل ڈیوائسز سےڈیٹا ہیک کرنےوالا بگ دور کردیاگیا

میٹا کی زیر ملکیت واٹس ایپ نے ایپل ڈیوائسز کے لیے ایک سنگین سکیورٹی بگ کی نشاندہی کرتے ہوئے اس کو دور کرنے کا اعلان کیا ہے، جس کا استعمال ہیکرز صارفین کے ڈیٹا تک خفیہ طور پر رسائی حاصل کرنے کے لیے کر رہے تھے۔

اس بگ کو “زیرو کلک بگ” کہا جاتا ہے، جو ہیکرز کو صارف کی کسی بھی کارروائی کے بغیر ان کی ڈیوائسز پر قبضہ کرنے اور ڈیٹا چوری کرنے کی سہولت فراہم کرتا ہے۔ واٹس ایپ نے اس مسئلے کو اپنے آئی او ایس اور میک ایپس میں پچاس سے زیادہ مخصوص صارفین کو متاثر کرنے والے ایک بگ کے طور پر تسلیم کیا اور اس کو درست کرنے کے لیے فوری اقدامات کیے ہیں۔

میٹا کے مطابق، اس بگ کو CVE-2025-55177 کے نام سے شناخت کیا گیا ہے، اور یہ حالیہ چند ماہ میں مخصوص ہدف کے تحت حملوں میں استعمال کیا جا رہا تھا۔ ایمنسٹی انٹرنیشنل سکیورٹی لیب کے سربراہ ڈوناچا او سیاربھیل نے اسے “ایڈوانس اسپائی ویئر مہم” کے طور پر بیان کیا۔ اس بگ کے ذریعے ہیکرز صارفین سے کسی قسم کا رابطہ کیے بغیر ان کے ڈیٹا تک رسائی حاصل کر لیتے تھے۔

میٹا نے تصدیق کی کہ اس بگ کا پتا چلنے کے بعد، کچھ ہفتے پہلے اس کو درست کر دیا گیا، اور متاثرہ صارفین کو اس حوالے سے نوٹیفکیشن بھیج دی گئی ہے۔