این ای ڈی یونیورسٹی آف انجینئرنگ اینڈ ٹیکنالوجی کے محققین نے پاکستان کی پہلی خودکار (ڈرائیور کے بغیر چلنے والی) گاڑی کا کامیاب ٹیسٹ ڈرائیو کر دکھایا، جو مکمل طور پر مصنوعی ذہانت کی بنیاد پر تیار کی گئی ہے۔
ٹیسٹ کے دوران گاڑی نے نید کیمپس کی سڑکوں پر رواں اور متوازن انداز میں سفر کیا، جس نے موقع پر موجود افراد کی توجہ اپنی جانب مبذول کر لی۔
یہ منصوبہ تقریباً ایک سال قبل نیشنل سینٹر فار آرٹیفیشل انٹیلی جنس، شعبہ کمپیوٹر اینڈ انفارمیشن سائنسز میں شروع ہوا تھا۔ چین سے منگوائی گئی ایک برقی گاڑی کو جدید روبوٹکس، سینسرز، میپنگ ٹیکنالوجی، کمپیوٹر وژن اور الگورتھمز کی مدد سے خودکار ڈرائیونگ نظام میں تبدیل کیا گیا۔
پروجیکٹ کے سربراہ اور ڈائریکٹر این سی اے آئی ڈاکٹر محمد خرم کے مطابق ٹیم نے ریڈار اور کمپیوٹر وژن کے امتزاج سے نظام کو مزید مؤثر بنایا ہے۔ ابتدا میں اسٹیئرنگ کنٹرول پر کام مکمل کیا گیا، جبکہ اس وقت آبجیکٹ ڈیٹیکشن، لین شناخت، رفتار کی حد کی پہچان اور ٹریفک سگنل ریکگنیشن جیسے اہم فیچرز پر پیش رفت جاری ہے تاکہ گاڑی حقیقی معنوں میں مکمل خودکار ڈرائیونگ کی صلاحیت حاصل کرسکے۔
فی الحال گاڑی کی رفتار 15 سے 20 کلومیٹر فی گھنٹہ تک محدود رکھی گئی ہے اور اس میں ٹرننگ موڈ کے ساتھ آنے والی ٹریفک کے بارے میں فیصلہ سازی کا نظام بھی شامل کر دیا گیا ہے۔
ٹیم کے مطابق یہ خودکار گاڑی پاکستان کے غیر منظم شہری ٹریفک ماحول میں چلنے کے قابل چند تجرباتی ماڈلز میں سے ایک ہے، جس کے سینسرز اور سسٹمز کو خاص طور پر مضبوط بنایا گیا ہے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔