ایل پی جی کی قیمت میں کمی، مگر سرکاری نرخ پر عملدرآمد نہ ہو سکا

کراچی میں مائع پیٹرولیم گیس (ایل پی جی) کی قیمت میں معمولی کمی دیکھنے میں آئی ہے، جس کے بعد ایل پی جی دس روپے فی کلو سستی ہو گئی ہے۔ حالیہ کمی کے بعد شہر میں ایل پی جی کی فی کلو قیمت 300 روپے سے کم ہو کر تقریباً 290 روپے تک پہنچ گئی ہے، تاہم یہ قیمت اب بھی سرکاری طور پر مقرر کردہ نرخ سے کہیں زیادہ ہے۔

آئل اینڈ گیس ریگولیٹری اتھارٹی (اوگرا) کی جانب سے ایل پی جی کی سرکاری قیمت 209 روپے فی کلو مقرر کی گئی ہے، لیکن اس کے باوجود مارکیٹ میں اس نرخ پر ایل پی جی کی دستیابی ممکن نہیں ہو سکی۔ شہریوں کا کہنا ہے کہ دکاندار اور ڈسٹری بیوٹرز سرکاری نرخ کو نظرانداز کرتے ہوئے من مانے دام وصول کر رہے ہیں۔

شہری حلقوں نے شکایت کی ہے کہ مہنگی ایل پی جی کے باعث گھریلو بجٹ شدید متاثر ہو رہا ہے، خصوصاً وہ افراد جو کھانا پکانے کے لیے مکمل طور پر ایل پی جی پر انحصار کرتے ہیں۔ عوام نے مطالبہ کیا ہے کہ متعلقہ ادارے قیمتوں پر مؤثر نگرانی کریں اور اوگرا کی جانب سے مقرر کردہ نرخوں پر عملدرآمد یقینی بنایا جائے۔

دوسری جانب شہریوں کا یہ بھی کہنا ہے کہ قیمتوں میں معمولی کمی خوش آئند ہے، تاہم جب تک سرکاری نرخ پر ایل پی جی فروخت نہیں کی جاتی، اس کمی کا حقیقی فائدہ صارفین تک نہیں پہنچے گا۔ عوام نے حکومت اور ضلعی انتظامیہ سے مطالبہ کیا ہے کہ ناجائز منافع خوری کے خلاف فوری اقدامات کیے جائیں تاکہ عام آدمی کو ریلیف مل سکے۔