پی ایس ایل کا 11 واں سیزن 26 مارچ سے شروع ہوگا، نیویارک میں پہلی بار روڈ شو

پاکستان سپر لیگ (پی ایس ایل) کے مداحوں کے لیے خوشخبری آ گئی ہے کیونکہ لیگ کے 11 ویں سیزن کی تاریخوں کا اعلان کر دیا گیا ہے۔ پاکستان کرکٹ بورڈ (پی سی بی) کے مطابق، یہ ایونٹ 26 مارچ سے شروع ہو کر 3 مئی تک جاری رہے گا۔

پی سی بی نے نئی ٹیموں کی نیلامی کی تاریخ بھی متعین کر دی ہے جو 8 جنوری کو ہوگی۔ بولی جمع کرانے کی مدت میں توسیع کے بعد یہ تاریخ طے کی گئی۔

تاریخ میں پہلی بار، پی ایس ایل کا روڈ شو امریکہ کے شہر نیویارک میں منعقد ہوا، جس میں پی سی بی کے چیئرمین محسن نقوی سمیت کئی قومی کرکٹرز اور سابق کھلاڑی شامل ہوئے۔ اس موقع پر پی ایس ایل کی بین الاقوامی سطح پر مقبولیت اور سرمایہ کاری کو فروغ دینے کے حوالے سے بھی بات کی گئی۔

پی سی بی چیئرمین محسن نقوی نے بتایا کہ اس سال لیگ کے 11 میچز فیصل آباد میں کھیلے جائیں گے۔ اس کے علاوہ، لیگ کی بہتری اور دنیا کی بہترین ٹی ٹوئنٹی لیگ بنانے کے لیے اقدامات جاری ہیں۔ سابق کھلاڑی وسیم اکرم اور رمیز راجہ نے بھی نوجوان کرکٹرز کے لیے پی ایس ایل کی اہمیت پر زور دیا اور کہا کہ لیگ غیرملکی کھلاڑیوں کے ساتھ کھیلنے کا بہترین موقع فراہم کرتی ہے۔

نیویارک روڈ شو میں قومی کھلاڑیوں کے علاوہ امریکہ میں پاکستان کے سفیر رضوان سعید شیخ نے بھی شرکت کی اور کھیل کو سفارتکاری اور ثقافتی تعلقات کے فروغ کا ذریعہ قرار دیا۔

پی سی بی نے روڈ شو میں یہ بھی اعلان کیا کہ کراچی کے نیشنل اسٹیڈیم کو نئے سرے سے تیار کیا جائے گا، جبکہ مظفرآباد اور حیدرآباد کے اسٹیڈیمز کی بحالی اور جدید کاری کی بھی منصوبہ بندی کی گئی ہے۔