امریکی خلائی کمپنی نے چاند پر پہلا ہوٹل بنانے کا اعلان کر دیا

امریکی خلائی کمپنی Galactic Resource Utilization Space نے اعلان کیا ہے کہ وہ چاند پر دنیا کا پہلا ہوٹل تعمیر کرنے جا رہی ہے، جسے 2032 تک مکمل کر کے سیاحوں کے لیے کھولنے کا ارادہ ہے۔
کمپنی کے مطابق یہ ہوٹل زمین پر تیار کیا جائے گا اور بعد ازاں خصوصی خلائی مشنز کے ذریعے چاند کی سطح پر منتقل کیا جائے گا۔ ابتدائی مرحلے میں ہوٹل میں صرف چار مہمان قیام کر سکیں گے۔
ہوٹل میں قیام کرنے والے سیاح چاند کے دلکش مناظر دیکھنے، سطحِ قمر پر چہل قدمی، خصوصی گاڑی چلانے اور گالف کھیلنے جیسے منفرد تجربات سے لطف اندوز ہوں گے۔
کمپنی نے بتایا کہ اگر تمام سرکاری اجازت نامے وقت پر مل گئے تو تعمیراتی کام 2029 میں شروع ہو سکتا ہے۔ ہوٹل میں قیام کی ابتدائی قیمت بہت زیادہ ہوگی، اور ہر مہمان سے تقریباً ایک ملین ڈالر بطور پیشگی ادائیگی لی جائے گی۔
Galactic Resource Utilization Space کے مطابق جیسے جیسے خلائی سیاحت عام ہوتی جائے گی، قیمتوں میں کمی متوقع ہے، بالکل ویسے ہی جیسے ہوابازی کے ابتدائی دور میں صرف امیر طبقے کے افراد سفر کر سکتے تھے۔
ماہرین کا کہنا ہے کہ یہ منصوبہ خلائی سیاحت کے شعبے میں ایک نیا سنگِ میل ثابت ہو سکتا ہے اور مستقبل میں عام سیاحوں کے لیے خلا میں قیام کے امکانات کو مزید بڑھانے میں مددگار ہوگا۔