امریکی حملے میں مسافر طیارہ متاثر، انسانی امداد کا منصوبہ خطرے میں

ایران نے اعلان کیا ہے کہ امریکی فضائی کارروائی کے دوران مشہد ایئرپورٹ پر موجود ایک مسافر طیارہ متاثر ہوا ہے، جس کے باعث بھارت سے ایران کے لیے ضروری طبی اور امدادی سامان لانے کا منصوبہ متاثر ہونے کا خدشہ پیدا ہو گیا ہے۔
ایرانی حکام کے مطابق متاثرہ طیارہ ماہان ایئر کا ہے اور یہ نئی دہلی جانے والا تھا تاکہ وہاں سے ایرانی عوام کے لیے طبی اشیاء اور امدادی سامان حاصل کیا جا سکے۔ طیارے کی نئی دہلی روانگی یکم اپریل کو متوقع تھی، لیکن حملے کے بعد اس مشن کی تکمیل غیر یقینی ہو گئی ہے۔
اب تک امریکی حکام نے ایرانی دعوے کی تصدیق یا تردید نہیں کی ہے۔
واضح رہے کہ بھارت کی طرف سے 18 مارچ کو ایرانی ہلال احمر کے ذریعے ایران کو پہلی طبی امدادی کھیپ بھیجی گئی تھی، جس پر ایران کے سفارت خانے نے بھارتی عوام کا شکریہ ادا کیا تھا۔
ماہان ایئر ایران کی نجی ایئرلائن ہے، جو مغربی، وسطی، جنوبی اور جنوب مشرقی ایشیا کے ساتھ ساتھ مشرقی ایشیا کے مختلف ممالک کے لیے پروازیں چلاتی ہے۔