امریکہ : نارنجی رنگ کی نایاب شارک دریافت

امریکا کے ساحل پر ایک نایاب اور غیر معمولی نارنجی رنگ کی شارک مچھلی کا انکشاف ہوا ہے، جسے کوسٹا ریکا کے ساحل پر ماہی گیر نے دریافت کیا۔ یہ واقعہ تورٹوگیرو نیشنل پارک کے قریب پیش آیا، جہاں ماہی گیر گارون واٹسن مچھلی کے شکار کے دوران اپنی کشتی کے قریب اس حیرت انگیز شارک کو دیکھ کر دنگ رہ گئے۔

شارک کی لمبائی تقریباً 6 فٹ 6 انچ تھی اور اس کی جسمانی رنگت نارنجی تھی، جبکہ اس کی آنکھیں سفید رنگ کی تھیں، جو اسے مزید منفرد اور خوفناک بناتی تھیں۔ سائنسدانوں کا کہنا ہے کہ یہ شارک ایک نایاب حالت “زینتھ ازم” کا شکار ہے، جس کے نتیجے میں اس کی رنگت پیلے یا نارنجی رنگ میں تبدیل ہوگئی ہے۔

ماہرین کے مطابق، اس شارک کی سفید آنکھیں بھی ایک غیر معمولی خصوصیت ہیں، جس سے یہ امکان ظاہر ہوتا ہے کہ اس میں البینیزم کی خصوصیات بھی موجود ہو سکتی ہیں۔ البینیزم کے اثرات کی وجہ سے اس کی جلد، آنکھیں اور دیگر جسمانی حصے سفید رنگ کے ہو گئے ہیں۔

یہ حیرت انگیز شارک مچھلی سمندری حیاتیات کے جریدے میں شائع کی گئی تصاویر کے ذریعے عالمی سطح پر معروف ہو گئی ہے، اور یہ ایک اہم سائنسی دریافت کے طور پر منظر عام پر آئی ہے۔

اس نایاب مچھلی کی دریافت نے ماہرین اور سمندری حیاتیات کے شوقین افراد کو خاصی حیرانی میں مبتلا کر دیا ہے اور اس کی مزید تحقیق کی امید پیدا کی ہے۔