امریکا اور فرانس کے درمیان گرین لینڈ کے معاملے پر کشیدگی بڑھ گئی

امریکی صدر ڈونلڈ ٹرمپ کی گرین لینڈ پر امریکی کنٹرول کی کوششوں نے امریکہ اور یورپی ممالک کے تعلقات میں تناؤ پیدا کر دیا ہے۔ اس کشیدگی میں اضافہ اس وقت ہوا جب صدر ٹرمپ نے فرانسیسی صدر ایمانوئل ماکروں کی جانب سے بھیجا گیا نجی پیغام سوشل میڈیا پر شیئر کر دیا۔
ٹرمپ نے ماکروں کے بارے میں کہا کہ وہ جلدی صدر عہدے سے مستعفی ہو جائیں گے۔ اس کے بعد دونوں رہنماؤں کے بیانات میں سختی دیکھی گئی۔ صدر ٹرمپ نے گرین لینڈ کو اسٹریٹجک اور اقتصادی نقطہ نظر سے اہم قرار دیا، جبکہ یورپی ممالک نے اس معاملے کو بین الاقوامی قوانین اور خودمختاری کے تناظر میں دیکھا۔
ٹرمپ نے فرانس کے رویے پر بھی تنقید کی کہ پیرس ان کے تجویز کردہ “بورڈ آف پیس” میں شامل ہونے سے ہچکچا رہا ہے اور کہا کہ وہ فرانسیسی شراب پر ٹیرف بڑھا سکتے ہیں۔ ان کا کہنا تھا کہ ایسے اقدامات سے فرانس خود اس بورڈ میں شامل ہو جائے گا، حالانکہ امریکی حکومت کو اس کی ضرورت نہیں۔
اس کے جواب میں فرانسیسی صدر ماکروں نے ورلڈ اکنامک فورم سے خطاب کرتے ہوئے کہا کہ عالمی قوانین کی پاسداری کمزور ہو رہی ہے اور طاقت کے ذریعے خودمختاری کو نقصان پہنچانا خطرناک رجحان ہے۔ انہوں نے یورپ کی اقتصادی خودمختاری اور چینی سرمایہ کاری کے کردار پر بھی بات کی اور کہا کہ یورپی ممالک کو عالمی حالات کے پیش نظر متوازن اور آزادانہ فیصلے کرنے ہوں گے۔