الیکشن کمیشن نےنگران حکومت کی مدت میں توسیع کی سفارش کر دی

اسلام آباد: الیکشن کمیشن نے نگران حکومت کی مدت میں توسیع اور انتخابی عمل سے متعلق آئین میں ترمیم کی سفارش کر دی ہے۔

ذرائع کے مطابق الیکشن کمیشن نے آئین کے آرٹیکل 224 ون میں ترمیم کی تجویز دی ہے۔ اس کے تحت اسمبلیوں کی تحلیل کی صورت میں انتخابات نوے دن کے بجائے 120 دن میں کرانے کی تجویز ہے، جبکہ اسمبلی کی مدت پوری ہونے پر انتخابات ساٹھ دن کے بجائے 90 دن میں کرانے کی سفارش کی گئی ہے۔

اس کے علاوہ انتخابی مہم کے دورانیے کو بھی 28 دن سے بڑھا کر 45 دن کرنے کی تجویز دی گئی ہے۔ ذرائع کا کہنا ہے کہ انتخابی شیڈول اور عدالتی کارروائیوں کے باعث بیلٹ پیپرز کی چھپائی میں مسائل پیش آتے ہیں، اور نگران حکومت کی مدت میں اضافہ انتخابی تیاریوں کو مؤثر اور مکمل بنانے کے لیے ضروری ہے۔

الیکشن کمیشن کی لیگل ریفارم کمیٹی نے یہ سفارشات وزارت پارلیمانی امور کو بھی ارسال کر دی ہیں۔