اسرائیل نے یوکرین کو پیٹریاٹ دفاعی نظام فراہم کر دیا، زیلنسکی کی تصدیق

کیف / یروشلم – یوکرین کے صدر ولودومیر زیلینسکی نے تصدیق کی ہے کہ ان کے ملک کو اسرائیل کی جانب سے پیٹریاٹ میزائل دفاعی نظام موصول ہو چکا ہے اور یہ ملک میں فعال طور پر تعینات کر دیا گیا ہے۔

یہ بیان ایک ایسے وقت میں سامنے آیا ہے جب ماضی میں اسرائیلی وزارتِ خارجہ نے یوکرین کو پیٹریاٹ نظام کی فراہمی کی خبروں کی تردید کی تھی۔ تاہم اب زیلنسکی کی تصدیق نے بین الاقوامی سطح پر نئی بحث کو جنم دیا ہے۔

صدر زیلنسکی نے عندیہ دیا ہے کہ یوکرین کو جلد ہی مزید دو پیٹریاٹ سسٹمز ملنے کی امید ہے، جو فضائی دفاع کے لیے انتہائی اہم سمجھے جاتے ہیں۔

اسرائیلی سفیر مائیکل برودسکی نے اس سے قبل ایک مقامی یوکرینی بلاگر کو انٹرویو میں بتایا تھا کہ یہ سسٹم یوکرین کو فراہم کیے گئے ہیں، تاہم اس بیان کے بعد اسرائیلی وزارتِ خارجہ نے وضاحت دی تھی کہ ایسی کسی فراہمی کی تصدیق نہیں کی جا سکتی۔

پیٹریاٹ سسٹمز کو امریکہ نے خلیجی جنگ کے دوران اسرائیل کو فراہم کیا تھا، اور اب ان کا یوکرین میں موجود ہونا ایک اسٹریٹجک تبدیلی کی نشاندہی کرتا ہے۔ ماہرین کے مطابق یہ نظام روسی میزائل حملوں کے خلاف یوکرین کی دفاعی صلاحیت کو مضبوط کرے گا۔

2022 سے جاری جنگ کے دوران یوکرین نے مسلسل مغربی اتحادیوں سے جدید دفاعی نظام کی درخواست کی ہے۔ اسرائیل کی جانب سے ممکنہ طور پر دفاعی تعاون کی فراہمی، اگر باضابطہ طور پر تسلیم کی جاتی ہے، تو یہ اس کی خارجہ پالیسی میں ایک اہم موڑ ہو سکتا ہے۔

بین الاقوامی مبصرین اب اس بات کا جائزہ لے رہے ہیں کہ آیا یہ اقدام اسرائیلی حکومت کی پالیسی کا حصہ تھا یا کسی انفرادی فیصلے کے تحت عمل میں آیا۔