کاپیسا میں بدھ مت دور کا دو ہزار سال قدیم مجسمہ دریافت

افغانستان کے صوبے کاپیسا میں بدھ مت کے دور سے منسوب تقریباً دو ہزار سال قدیم ایک اہم تاریخی مجسمہ دریافت ہوا ہے۔

مقامی حکام کے مطابق یہ مجسمہ بدھ مت عہد میں تیار کیا گیا تھا اور اس کا تعلق گرییکو۔بدھسٹ فنِ تعمیر سے ہے، جس میں قدیم یونانی (ہیلینسٹک) اور بدھ مت کے فنی عناصر یکجا نظر آتے ہیں۔

طالبان کے زیرانتظام محکمہ اطلاعات و ثقافت کا کہنا ہے کہ یہ نادر مجسمہ کاپیسا کے علاقے کارا تاز میں ایک رہائشی مکان سے برآمد ہوا۔ ابتدائی جائزے کے مطابق یہ مجسمہ اس دور کی فنونِ لطیفہ اور مذہبی ثقافت کی عکاسی کرتا ہے۔

ماہرین آثارِ قدیمہ کے مطابق یہ دریافت قدیم افغانستان میں بدھ تہذیب، فنکارانہ روایات اور علاقائی و بین الاقوامی ثقافتی روابط کو سمجھنے میں مددگار ثابت ہو سکتی ہے۔

یہ دریافت ایک ایسے پس منظر میں سامنے آئی ہے جب عالمی سطح پر افغانستان میں تاریخی اور ثقافتی ورثے کے تحفظ سے متعلق خدشات کا اظہار کیا جاتا رہا ہے۔ فی الحال مجسمہ مقامی حکام کی تحویل میں ہے، تاہم یہ واضح نہیں کہ عالمی ماہرین کو اس کے تفصیلی مطالعے کی اجازت دی جائے گی یا نہیں۔