اسرائیلی اہلکار نے نماز پڑھتے فلسطینی کو گاڑی سے ٹکر مار دی

مقبوضہ مغربی کنارے میں ایک اسرائیلی ریزرو فوجی نے سڑک کنارے نماز ادا کرنے والے فلسطینی شخص پر اے ٹی وی گاڑی چڑھا دی، جس کی ویڈیو سوشل میڈیا پر وائرل ہونے کے بعد اسرائیلی فوج پر شدید تنقید کی جا رہی ہے۔
اسرائیلی فوج نے واقعے کے بعد بتایا کہ اہلکار کے فوجی اختیارات کی خلاف ورزی کی گئی، اس کا فوجی کنٹریکٹ ختم کر دیا گیا اور اسلحہ ضبط کر لیا گیا۔ فلسطینی شخص کو اسپتال منتقل کیا گیا، لیکن بعد میں گھر بھیج دیا گیا کیونکہ وہ بظاہر زخمی نہیں تھا۔
حملے کے بعد فلسطینی شخص کے والد نے دعویٰ کیا کہ اہلکار نے ان کے بیٹے پر مرچوں کا اسپرے بھی کیا، تاہم ویڈیو میں یہ تصدیق نہیں ہوئی۔ حملہ کرنے والے اہلکار کو گرفتار کر کے پانچ دن کے لیے نظر بند کر دیا گیا ہے۔