نگران وزیر اعظم کی روضہ رسول صلی اللہ علیہ وآلہ وسلم پر حاضری

لاہور: (ہاٹ لائن نیوز) نگران وزیراعظم انوارالحق کاکڑ نے مدینہ منورہ میں مسجد نبوی صلی اللہ علیہ وآلہ وسلم میں حاضری دی، نوافل ادا کیے اور روضہ رسول پر حاضری دی اور دعا بھی کی۔

انہوں نے مسجد نبوی سے ملحقہ بین الاقوامی میلے اور سیرت نبوی اور اسلامی تہذیب کے میوزیم کا بھی دورہ کیا۔

وزیراعظم کو تاریخی عجائب گھر کے بارے میں ایک جامع بریفنگ دی گئی جس میں پیغمبر اسلام (صلی اللہ تعالیٰ علیہ وآلہ وسلم) کی زندگی اور تعلیمات اور اسلامی تہذیب کے مختلف پہلوؤں کو دکھایا گیا ہے۔

وزیر اعظم کاکڑ نے میوزیم کے لیے تعریف کا اظہار کیا اور اسلامی ورثے کے تحفظ کے لیے کی جانے والی کوششوں کو سراہا۔

اس موقع پر میوزیم کے سیکرٹری بورڈ آف ڈائریکٹرز ڈاکٹر ناصر مسفیر الزہرانی نے وزیر اعظم کو شیلڈ اور کتابیں پیش کیں جو کہ پاکستان اور سعودی عرب کے درمیان اسلامی ورثے کے فروغ اور باہمی افہام و تفہیم کو فروغ دینے کے حوالے سے پرانے تعلق کی علامت ہیں۔