نوجوان کا انگوٹھا کاٹ کراے ٹی ایم سےرقم نکلوانےوالا ملزم گرفتار

ہاٹ لائن نیوز : پنجاب کے شہر شیخوپورہ میں پولیس نےدھوکے سے اپنے کزن کو قتل کرکے انگوٹھا کاٹ کر اے ٹی ایم سے 10 لاکھ روپےنکالنے والے ملزم کو گرفتار کرلیا۔

شیخوپورہ پولیس نے 2گھنٹے کی مسلسل کوشش، جدید ٹیکنالوجی اور انسانی ذہانت کی مدد سے مقتول کے کزن کو 2 دوستوں سمیت گرفتارکرلیا۔

پولیس حکام کاکہنا ہے کہ ملزمان نےوالدین کے اکلوتے بیٹے یاسین کو گولی مار کر قتل کیا اور اسکا انگوٹھا کاٹ کر اے ٹی ایم سے 10 لاکھ روپے نکال لیے۔

ملزمان بوری بند لاش کو نہر میں پھینکنے جارہے تھے کہ پولیس نے گلی میں کھڑی کار سے لاش برآمد کرلی۔ ملزم سےمقتول کا کٹا ہوا انگوٹھا بھی برآمد ہوا ہے۔

ملزم انگوٹھے کا استعمال کرکے مزید رقم نکلوانا چاہتا تھا۔ مقتول یاسین والدین کا اکلوتا بیٹا اور فیصل آباد کا رہائشی تھا۔

شیخوپورہ پولیس تھانہ ہاؤسنگ کالونی نے مقتولہ کی والدہ کی شکایت پر مقدمہ درج کر لیا جبکہ مزید تفتیش جاری ہے۔

دوسری جانب آر پی او شیخوپورہ نے اندھے قتل کا سراغ لگانے اور ملزمان کو فوری گرفتار کرنے پر ایس ایچ او ولی حسن پاشا اور انکی ٹیم کو شاباش دی۔