ناخنوں کے رنگ میں تبدیلی: صحت سے جڑی اہم علامات

طبی ماہرین کا کہنا ہے کہ انسانی ناخن صرف خوبصورتی کا حصہ نہیں بلکہ مجموعی صحت کے بارے میں بھی اہم اشارے دیتے ہیں۔ اگر ناخنوں کا رنگ اچانک بدل جائے یا طویل عرصے تک غیر معمولی رہے تو یہ جسم کے اندرونی مسائل کی نشاندہی کر سکتا ہے۔
ماہرین کے مطابق کچھ مخصوص رنگ ایسے ہیں جنہیں نظر انداز نہیں کرنا چاہیے، کیونکہ یہ جگر، گردوں، دل، پھیپھڑوں یا خون کی کمی جیسی بیماریوں سے جڑے ہو سکتے ہیں۔
سفید ناخن
ناخنوں کا زیادہ سفید نظر آنا بعض اوقات جگر کے مسائل یا ذیابیطس سے منسلک ہو سکتا ہے، خاص طور پر اگر یہ تبدیلی مستقل ہو۔
آدھے گلابی، آدھے سفید ناخن
اگر ناخنوں کا اوپری حصہ سفید اور نچلا حصہ گلابی ہو تو یہ گردوں کی خرابی کی علامت سمجھا جاتا ہے۔
پیلا رنگ
پیلاہٹ پھیپھڑوں کی بیماری یا خون کی روانی میں رکاوٹ کی طرف اشارہ کر سکتی ہے، تاہم فنگل انفیکشن یا زیادہ سگریٹ نوشی بھی اس کی وجہ بن سکتی ہے۔
ناخن کے نیچے گہرا سرخ یا سیاہی مائل دھبہ
ناخن کے نیچے موجود گہرا دھبہ، خاص طور پر اگر وقت کے ساتھ بڑھے، جلد کے کینسر (میلانوما) کی علامت بھی ہو سکتا ہے، جس پر فوری توجہ ضروری ہے۔
نیلے ناخن
اگر ناخن نیلے دکھائی دیں تو یہ خون میں آکسیجن کی کمی کا عندیہ ہو سکتا ہے، جو دل یا پھیپھڑوں کے مسائل سے جڑا ہوتا ہے۔
پیلا پن اور سفید چھائیں
ناخنوں میں غیر فطری سفید یا پیلا رنگ مجموعی صحت کی خرابی یا کسی پوشیدہ بیماری کی نشانی ہو سکتا ہے۔
ماہرین مشورہ دیتے ہیں کہ اگر ناخنوں کے رنگ یا ساخت میں غیر معمولی اور مستقل تبدیلی محسوس ہو تو خود تشخیص کے بجائے ڈاکٹر سے رجوع کیا جائے، تاکہ بروقت علاج ممکن ہو سکے۔