دیوسائی اسکردو میں پھنسے سیاحوں کو بچانے کیلیے آپریشن شروع

ہاٹ لائن نیوز : پاک فوج نے دیوسائی اسکردو میں دو گاڑیوں میں پھنسے مسافروں کو نکالنے کے لیے فوری فضائی اور زمینی ریسکیو آپریشن شروع کر دیا ہے۔

14 نومبر کو 15 مسافر 2 گاڑیوں میں گالٹری سے دیوسائی کے راستے جا رہے تھے۔ شدید برف باری کی وجہ سے دیوسائی میں پھنس گئے۔

مسافروں سے زمینی رابطہ منقطع ہوگیا جس پر مسافروں کے اہل خانہ اور اہل علاقہ نے پاک فوج سے مدد کی اپیل کی۔

پاک فوج کے جوانوں پر مشتمل ایک مشترکہ ٹیم مسافروں کو بچانے کے لیے پیدل روانہ ہوئی۔ ریسکیو آپریشن میں پاک فوج کے دو ہیلی کاپٹر بھی حصہ لے رہے ہیں۔

خراب موسم اور شدید برف باری کے باعث فضائی آپریشن میں مشکلات کا سامنا ہے۔