دوحہ: پاکستان اور قطر کے تعلقات میں نیا باب، امیر قطر کا پاکستان۔سعودی دفاعی معاہدے کا خیرمقدم

دوحہ میں صدرِ مملکت آصف علی زرداری اور امیرِ قطر شیخ تمیم بن حمد الثانی کے درمیان اہم ملاقات ہوئی، جس میں دونوں ممالک کے برادرانہ تعلقات کو مزید فروغ دینے پر اتفاق کیا گیا۔ ملاقات میں بلاول بھٹو زرداری اور پاکستان کے سفیر بھی شریک تھے۔

گفتگو کے دوران امیرِ قطر نے پاکستان اور سعودی عرب کے درمیان دفاعی تعاون کے حالیہ معاہدے کو خوش آئند اور بروقت اقدام قرار دیا۔ انہوں نے کہا کہ پاکستان خطے میں ایک منفرد حیثیت رکھتا ہے جو بیک وقت چین، مغرب اور خلیجی ممالک کے ساتھ مضبوط تعلقات رکھتا ہے، اور قطر کو پاکستان کی کامیابیوں پر فخر ہے۔

صدر آصف علی زرداری نے قطر کی جانب سے دوحہ مذاکرات کی میزبانی اور افغانستان سے متعلق مثبت کردار کو سراہا۔ انہوں نے دفاع، دفاعی پیداوار، زراعت اور غذائی تحفظ کے شعبوں میں تعاون بڑھانے کی تجویز پیش کی، جسے امیرِ قطر نے قبول کرتے ہوئے متعلقہ حکام کو فوری رابطے کی ہدایت دی۔

امیرِ قطر نے قطر میں پاکستانی کمیونٹی کے کردار کی تعریف کرتے ہوئے ان کی تعداد میں اضافے کی خواہش کا اظہار کیا۔

ملاقات کے اختتام پر صدر زرداری نے امیرِ قطر کو دورۂ پاکستان کی دعوت دی، جسے انہوں نے قبول کرتے ہوئے اعلان کیا کہ وہ آئندہ سال کے اوائل میں پاکستان کا دورہ کریں گے۔