اپنی ریکارڈ شدہ آواز سننا ناگوار کیوں لگتا ہے ؟

لاہور: ( ہاٹ لائن نیوز) بہت سے افراد صوتی پیغامات بھیجنے کے بعد اپنی آواز کو سننے سے گریز کرتے ہیں، کیوں کہ انہیں اپنی آواز سننا ناگوار ہوتا ہے ، ایسا کیوں ہوتا ہے ؟

اسی سوال کا جواب دینے کیلیے ہارورڈ یونیورسٹی کے ” ماس آئی اینڈ ایئر ہسپتال ” کے محققین نے چند افراد کو اپنی ریکارڈ شدہ آوازیں سننے کو کہا ، ان افراد میں سے 58 فی صد لوگ اپنی آواز سننا نہیں چاہتے تھے۔ جبکہ 39 فی صد افراد نے کہا کہ “ان کی آوازیں بے حد پریشان کن ہیں”۔

محققین کے مطابق اس کی کئی وجوہات ہیں ، سب سے اہم وجہ یہ ہے کہ ڈیوائس کے ذریعے سنتے وقت آواز غیر معیاری سنائی دیتی ہے ۔

اس حوالے سے امریکن اسپیچ لینگوئج ہیئرنگ ایسوسی ایشن کی ڈائریکٹر ٹریسیا ایشبی سکیبیز کا کہنا ہے کہ “آواز کو منتقل کرنے کے 2 طریقے ہیں” ، ٹریسیا کے مطابق “ہم اپنی آواز کو ہوا اور ہڈیوں ( کان کے اندر چھوٹی ہڈیاں) کی ترسیل کے ذریعےسنتے ہیں ، یوں ہم حقیقی آواز کو سنتے ہیں لیکن جب ہم ریکارڈنگ میں اپنی آواز سنتے ہیں تو ہم صرف ہوا کی ترسیل کے ذریعے خود کو سن رہے ہوتے ہیں۔ اس لیے آواز اپنا معیار کھو دیتی ہے‘‘۔