ارجنٹائن میں طوفان سےشدیدجانی ومالی نقصان

ہاٹ لائن نیوز : ارجنٹائن میں طوفان کے باعث مختلف حادثات میں 13 افراد لقمہ اجل بن گئے، بیونس آئرس ایئرپورٹ پر طیارے کے حادثے کا منظر کیمرے میں قید ہوگیا۔

میڈیا رپورٹس کے مطابق طوفان کے باعث بیونس آئرس شہر میں تیز ہوائیں چلیں جس کے باعث دارالحکومت میں بجلی کی بندش سےشہریوں کو شدیدمشکلات کا سامنا کرنا پڑا۔

بیونس آئرس میں شدید طوفان نے ایروپارک ایئرپورٹ پر طیارے اور ٹرمینل کی عمارت کو نقصان پہنچایا۔ تیز ہوا کے باعث ایئرپورٹ پر کھڑے طیارے آپس میں ٹکرا گئے۔

ملک کے محکمہ موسمیات نے دارالحکومت بیونس آئرس کے رہائشیوں کو خبردار کیا ہے کہ طوفان نے دارالحکومت کو اورنج الرٹ کے تحت رکھا ہے، جو کہ دوسرا سب سے بڑا الرٹ ہے۔

ایک دن پہلے، طوفان بیونس آئرس سے 400 میل جنوب میں بندرگاہی شہر باہیا بلانکا سے ٹکرا گیا، جس نے 86 میل فی گھنٹہ کی رفتار سے ہوائیں چلائیں جس سے عمارتوں کی چھتیں اڑ گئیں اور کم از کم 13 افراد ہلاک ہوئے۔